رۋدنىي قالاسىندا تاۋەلسىزدىك العان جىلداردان بەرى ءبىرىنشى رەت 60 پاتەرلىك ەكى جاڭا ءۇي تاپسىرىلدى. بۇل ارەندالىق باسپانالاردى قالالىق اكىمدىكتە پاتەر كەزەگىندە تۇرعاندار الدى. ونىڭ كىلتىن وبلىس اكىمى ارحيمەد مۇحامبەتوۆ ءوزى كەلىپ تاپسىردى.
«رۋدنىي قالاسىن كوركەيتۋ ءۇشىن بيۋدجەتتەن كوپ قارجى جۇمسالۋدا. جاڭا ۇيلەر سالۋمەن قاتار, الداعى جىلى ەسكى ۇيلەردىڭ سىرتىن جوندەيتىن بولامىز» دەدى ارحيمەد بەگەجان ۇلى.
كەنشىلەر قالاسىندا سالىنعان ەكى ءۇيدىڭ ينفراقۇرىلىمى ءۇشىن بيۋدجەتتەن «نۇرلى جەر» باعدارلاماسى بويىنشا ءبىر ميلليارد تەڭگەدەن اسا قارجى ءبولىندى.
«بۇل ۇيلەرگە الەۋمەتتىك از قورعالعان تۇرعىندار كىرەتىن بولادى. ولار زەينەتكەرلەر, جەتىم بالالار, تولىق ەمەس وتباسىلار, مۇگەدەكتەر, كوپ بالالى وتباسىلار مەن مۇگەدەك بالالار اسىراپ وتىرعان اتا-انالار» دەدى قالا اكىمىنىنىڭ ورىنباسارى ەلەنا سكارەدينا.
الداعى جىلى قالاداعى پاركتە رۋدنىيدىڭ توڭىرەگىن بيىكتەن تۇگەل كورەتىن ديامەترى 40 مەترلىك شولۋ دوڭگەلەگى سالىناتىن بولادى.
ءنازيرا جارىمبەت
«ەگەمەن قازاقستان»
رۋدنىي